গুজৰাট ৰাজ্যৰ স্বাস্থ্যখণ্ডত এক বৃহৎ সংযোজন ।
ৰাজ্যখনৰ জনজাতীয় লোকক বিজ্ঞানসন্মত ভাৱে সুস্বাস্থ্য প্ৰদান কৰাৰ লক্ষ্যৰে গ্ৰহণ কৰা হৈছে এই পদক্ষেপ । যাৰ লক্ষ্য হৈছে বংশগত ৰোগসমূহৰ বিৰুদ্ধে নিখুঁত চিকিৎসা পদ্ধতিৰে প্ৰতিহত কৰা । এই পদক্ষেপ ২০২৫–২৬ চনৰ ৰাজ্যিক বাজেটৰ অংশ । ৰাজ্যিক জনজাতি উন্নয়ন মন্ত্ৰী কুবেৰ ডিণ্ডোৰৰ অধ্যক্ষতাত এক উচ্চ পৰ্যায়ৰ পৰামৰ্শত ঘোষণা কৰে এই প্ৰকল্পৰ ।
কেৱল জনজাতীয় সম্প্ৰদায়ক কেন্দ্ৰ কৰি জিন’ম ছিকুৱেন্সিং প্ৰকল্প আৰম্ভ কৰা ভাৰতৰ প্ৰথমখন ৰাজ্য হৈ পৰিছে গুজৰাট ।
এই পদক্ষেপৰ লক্ষ্য হৈছে জিনীয় স্বাস্থ্যজনিত বিপদ চিনাক্ত কৰা আৰু জনজাতীয় সকলৰ বাবে নিখুঁত স্বাস্থ্যসেৱা প্ৰসাৰ কৰা । প্ৰকল্পটোৱে ১৭খন জিলাৰ ২০০০ জনজাতীয় ব্যক্তিৰ জিন’মৰ ক্ৰমবিন্যাসৰ পৰিকল্পনা কৰিছে । ইয়াৰ নাম ক্ৰিয়েচন অৱ ৰেফাৰেন্স জিন’ম ডাটাবেছ ফৰ ট্ৰাইবেল পপুলেচন ইন গুজৰাট আৰু ইয়াক গুজৰাট বায়’টেকন’লজি ৰিচাৰ্চ চেণ্টাৰ (GBRC)ৰ দ্বাৰা ৰূপায়ণ কৰা হৈছে।
এই প্ৰকল্পটোৱে জিনীয় বিকাৰসমূহ আগতীয়াকৈ ধৰা পেলোৱাত সহায় কৰিব
ইয়াৰ লক্ষ্য হৈছে ছিকেল চেল এনিমিয়া , থেলাছেমিয়া আৰু জনজাতীয় গোটৰ মাজত সাধাৰণ বংশগত কেন্সাৰৰ দৰে অৱস্থাক আগতীয়াকৈ ৰোগ নিৰ্ণয় কৰা যাৰ ফলত সময়মতে ৰোগীৰ চিকিৎসা সম্ভৱপৰ হয় । এই পদক্ষেপৰ আন এক লক্ষ্য হৈছে জনজাতীয় স্বাস্থ্যৰ উন্নতিৰ বাবে পৰম্পৰাগত জ্ঞান আৰু আধুনিক বিজ্ঞানৰ মাজৰ ব্যৱধান দূৰ কৰা ।